^mGISKIM-IBILA-é-šár-ra MAN dan-nu MAN KIŠ MAN KUR aš-šur

MAN kúl-lat kib-rat 4-i eṭ-lu qar-du ša i-na GIŠ.tukul-ti

^da-šur ù ^dMAŠ DINGIR.MEŠ GAL.MEŠ-te EN.MEŠ-šu DU.MEŠ-ma

ú-šam-qi-tu ge-re-e-šu

iš-tu URU.KÁ.DINGIR ša KUR.URI.KI a-di A.AB.BA e-le-ni-te

ša SILIM-mu ^dšam-ši qa-a-te ik-šud 3-šu a-na KUR.na-a-i-ri

al-lik DAGAL.MEŠ KUR.na-a-i-ri iš-tu KUR.tum₄-me a-di KUR.da-ia-e-ni

qa-a-te lu ik-šud li-ṭí.MEŠ ù ma-da-at-ta.MEŠ lu am-ḫur

i-na siq-ri ^da-nim ^dIŠKUR DINGIR.MEŠ GAL.MEŠ-te EN.MEŠ-ia

a-na KUR.lab-na-na lu al-lik GIŠ.ÙR.MEŠ ša GIŠ.e-re-ni

a-na É ^da-nim ^dIŠKUR DINGIR.MEŠ GAL.MEŠ-te EN.MEŠ-ia lu ak-ki-is₅

áš-ša-a a-na KUR.a-mur-ri lu e-tiq KUR.a-mur-ri

a-na si-ḫír-te-ša lu ak-šud ma-da-at-ta.MEŠ ša KUR.ar-mada

KUR.gi-bal KUR.ṣi-du-ni ù KUR.KUR.MEŠ ša a-aḫ A.AB.BA

lu am-ḫur i-na ta-ia-ar-te-ia KUR.ḫa-at-ti

a-na paṭ gim-ri-ša lu ak-šud GIŠ.ÙR.MEŠ ša GIŠ.e-re-ni

ù ma-da-at-ta i-na UGU ^mì-ni-^dte-šub

MAN KUR.ḫa-⸢at⸣-ti lu-ú áš-ku-un

28-šu ar-ki aḫ-la-me-e KUR.ar-ma-ia.MEŠ ša-at-ta 2-šu

ÍD.pu-rat-ta lu e-te-bir iš-tu GÌR.MEŠ KUR-e lab-na-na

URU ta-ad-mar ša KUR.a-mur-ri a-di URU.ra-pi-qi ša KUR.kar-du-ni-áš

dáb-da-šu-nu lu áš-kun šal-la-su-nu bu-ša-šu-nu

a-na URU-ia aš-šur ub-la

a-na KUR.kar-du-ni-áš lu al-lik iš-tu URU.túr-šá-an ša e-ber-ta-an

ÍD.za-ba-KI.TA-i a-di URU.lu-ub-di lu ak-šud

URU.DIDLI.MEŠ-šu-nu lu ap-pu-ul i-na IZI.MEŠ lu áš-ru-up

šal-la-su-nu bu-ša-šu-nu a-na URU-⸢ia⸣ aš-šur ub-la

i-na ta-ia-ar-te-ia ša gir-ri-ia an-ni-im-ma

a-na KUR.su-ḫa lu al-lik iš-tu URU.ia-du-ri URU.sa-pi-ri-te

URU.ša-an-da-da URU.ḫa-ra-da ù URU.DIDLI.MEŠ

ša qa-bal ÍD.pu-rat-te lu ak-šud šal-la-su-nu

a-na la me-na lu-še-ṣa-a A.ŠÀ.MEŠ-šu-nu lu as-su-uḫ

GIŠ.SAR.MEŠ-šu-nu lu ak-ki-is₅

i-na qí-bit ^dMAŠ ÁG-ia ša-nu-te-ia a-na KUR.kar-du-ni-áš

lu al-lik BÀD-^mku-ri-gal-zu ša URU.si-im-bur

URU.si-par-šá-^dšá-maš URU.si-par-ša-^da-nu-ni-te URU.KÁ.DINGIR

URU.ú-pe-e ma-ḫa-a-zi.MEŠ GAL.⸢MEŠ ša⸣ KUR.⸢kar⸣-du-ni-áš

a-di ḫal-ṣa-a-ni-šu-nu lu-ú ak-šud šal-la-⸢su⸣-nu bu-ša-šu-nu

a-na la me-na lu še-ṣa-a É.GAL-la-⸢a-te⸣ ša URU.KÁ.DINGIR

ša ^mdAMAR.UTU-SUM-a-ḫi MAN KUR.kar-du-ni-áš ⸢lu ap⸣-pu-ul

NÍG.GA.MEŠ É.GAL.LIM.MEŠ-šu ma-a-aʾ-da ⸢lu⸣ áš-ša-a

^mdAMAR.UTU-SUM-a-ḫi MAN KUR.kar-du-ni-áš a-na e-mu-qi

um-ma-na-te.MEŠ-šu ù GIŠ.GIGIR.MEŠ-šu lu it-te-kil-ma

EGIR-ia lu il-li-ka i-na URU ši-tu-la ša el-la-an

URU.ak-ka-di ša UGU ÍD.^dIDIGNA it-te-ia lu im-da-ḫi-iṣ-ma

GIŠ.GIGIR.MEŠ-šu ma-aʾ-ta lu ap-ṭu-ur dáb-di qu-ra-di-i-šu

muq-tab-le-e-šu i-na qé-reb ta-ḫa-a-zi šu-a-tu

lu áš-kun lu iḫ-ḫi-is-ma a-na KUR-ti-šu lu i-túr

i-na u₄-me-šu-ma BÀD GAL-a ša URU.pa-ku-te ša i-na pa-na NUN-ú

a-lik pa-ni-ia e-pu-šu an-ḫu-ta la-be-ru-ta ⸢il⸣-li-ku

ú-né-kir₆ a-šar-šu ú-me-si dan-na-su al-šud

SIG₄.MEŠ al-bi-in uš-še ša BÀD šu-a-te ad-di 12 1/2 SIG₄.MEŠ

ú-qé-bir iš-tu uš-še-šu a-di gab-dib-be-šu ar-ṣi-ip

ú-šék-lil È a-sa-ia-a-te.MEŠ i-na qer-be-šu e-pu-uš

BÀD ú-šal-mi 3 šu-ši tik-pi a-na e-le-nu-ú ú-ša-qi

i-na UGU DU₆-šu GAL-e ši-pi-ik SAḪAR.MEŠ áš-pu-uk

UGU maḫ-re-e ú-dan-⸢nin⸣ ut-tir ḫi-re-ṣa i-na li-me-te-šu

aḫ-ru-uṣ É.GAL-la šu-bat MAN-te-ia i-na qer-be-šu

e-pu-uš iš-tu uš-še-⸢ša⸣ a-di gab-dib-be-ša ar-ṣi-ip

ú-šék-lil É.SIG₄.MEŠ-ša ù na-me-ri-ša ú-ša-qi-ma

i-na a-gúr-ri ú-re-ki-is₅ (over erasure) GIŠ.IG.MEŠ a-šu-ḫi ṣi-ra-a-te

i-na KÁ-ša ú-re-et-te NA₄.NA.RÚ-ia.MEŠ i-na qer-be-šu

áš-kun a-na ar-kàt u₄-me a-na u₄-um ṣa-a-ti

e-nu-ma BÀD ù É.GAL-lu₄ ša-a-tu-nu ú-šal-ba-ru-ma

e-na-ḫu NUN-ú EGIR-ú an-ḫu-su-nu lu-ud-di-iš

NA₄.NA.RÚ-ia.MEŠ li-mur-ma lil-ta-si Ì.MEŠ lip-šu-uš

UDU.SISKUR li-qi a-na áš-ri-šu-nu lu-te-er

aš-šur EN GAL-ú ù ^diš-tar a-ši-bat URU.4-DINGIR

ik-ri-bi-šu i-še-em-mu-ú

ITI.APIN UD.2.KÁM li-mu ^maš-šur-ša-ʾi-su-nu