a-na ^diš-tar šu-úr-bu-tim

ru-um-tì ì-lí qá-ri-it-tim

^dIN.NIN i-la-at ta-am-ḫa-ru

e-pí-ša-at tu-qu-un-ti

na-mi-ir-tì be-le-et da-ad-mi

ša-qu-tì i-gi₄-gi₄

ru-ba-a-at ^da-nun-na-ki na-ša-at pu-lu-úḫ-tim

be-el-tim ša mé-lam-mu-šu ša-mu-ú ka-at-mu

nam-ri-ir-ru-šu er-ṣe-tim ra-pa-aš-tim sa-aḫ-pu

ka-ši-da-at a-a-bi mu-ḫal-li-qá-at za-ma-nu

^d⸢INANNA⸣ a-kà-dè.KI be-le-et ta-ḫa-zi

ša-⸢ki⸣-na-at ṣu-la-a-tim

^dna-bi-um-na-ʾi-id LUGAL KÁ.DINGIR.RA.KI

ti-ri-iṣ qá-ti ^dtu-tu

à-aš-ru ka-an-šu pa-li-iḫ DINGIR GAL.GAL

re-é-a-am za-ni-nu-um

ša a-na ṭè-e-mi ì-lí pu-tu-uq-qú

GÌR.NÍTA ša-aḫ-ṭú mu-ur-te-ed-du-ú ú-si iš-tar

mu-ṭaḫ-ḫi-id sat-tuk-ku mu-šar-ri-iḫ ni-id-bé-e

ša ud-da-kam iš-te-né-eʾ-ú

du-mu-uq ma-ḫa-zi ì-⸢lí⸣

in é-sag-íl É.GAL DINGIR.⸢DINGIR⸣

šu-tu-ru zi-in-na-a-tim

i-gi-sa-a šu-ur-ru-ḫu ú-še-er-re-bu qé-reb-šu

a-na eš-re-e-ti DINGIR.DINGIR ka-la-ši-na

sa-ad-ru šu-ul-ma-nu

DUMU ^mdAG-ba-lat-su-iq-bi NUN em-qa a-na-ku

ì-nu-šu é-máš-da-ri É ^dINANNA a-kà-dè.KI

ša qé-er-bi KÁ.DINGIR.MEŠ.KI

ša uš-šu-šu in-na-mu-ú i-mu-ú kar-mi-iš

li-ib-na-as-su id-ra-num

iq-mu-ú di-ta-al-li-iš

a-šar-šu šu-ud-du-ú la ba-aš-mu sa-gu-šu

na-du-ú si-ma-ak-ki-šu

⸢na⸣-pa-ar-ku-ú qú-ut-re-nu

⸢e⸣-pe-eš É šu-a-ti lìb-bi i-ta-mi-ma

ka-ba-at-tì [x]-⸢áš⸣-ḫa-tuš

a-šar É šu-a-tim ⸢aš-te-ʾe⸣-e-ma

a-ḫi-iṭ te-em-⸢mé⸣-en-šu

i-ši-id-su ab-⸢re⸣-e-ma

ú-ki-in li-ib-na-as-su

é-máš-da-ri in qé-re-eb KÁ.DINGIR.RA.KI

e-eš-ši-⸢iš⸣ e-pú-uš

uš-[x x] uš-te-ši-ir

ú-[x]-⸢in⸣ te-em-mé-en-šu

a-⸢na šu-a⸣-ti ^dINANNA a-kà-dè.KI

i-la-at ta-am-ḫa-⸢ri⸣

É ša-a-ti šu-bat na-ar-mi-⸢ki⸣

ḫa-di^* (text: MI) iš na-ap-li-si-ma

qí-bi-i ba-la-ṭa₄

ša úr-⸢ru-ku⸣ u₄-mi-ia

šu-um-ú-du ša-na-ti-ia

ma-ḫa-ar ^dAMAR.UTU LUGAL ì-lí

at-mi-i ud-da-kam

a-šar qá-⸢ab⸣-li ù ta-ḫa-zi

i-da^* (text: ba) a-a al-ki

⸢lu⸣-na-ar a-a-bi-ia

lu-ša-am-qí-ti na-ki-ri-ia