a-na ^diš-tar šu-úr-bu-tim

ru-um-tì DINGIR.DINGIR qá-ri-it-⸢tim⸣

^dIN.NIN i-la-at ta-am-⸢ḫa⸣-[x]

e-pí-ša-at tu-⸢qu⸣-[x]-tim

na-mi-ir-tì be-⸢le-et da⸣-ad-mi

ša-qu-ti ^di-gi₄-gi₄

ru-ba-a-tì ^da-nun-na-ki

na-ša-a-at pu-lu-úḫ-tim

GAŠAN ⸢ša mé⸣-lam-mu-šu ša-mu-ú ka-at-mu

nam-ri-ir-ru-šu KI-tim DAGAL-tim sa-aḫ-pu

^dINANNA a-kà-dè.KI be-let ta-ḫa-za

ša-ki-na-at ṣu-la-a-tim

a-ši-ba-at é-máš-da-ri

ša qé-er-bi KÁ.DINGIR.RA.KI GAŠAN-ia

^dAG-na-ʾi-id LUGAL TIN.TIR.KI

ti-ri-iṣ qá-ti ^dtu-tu

à-aš-ru ka-an-šu pa-liḫ DINGIR GAL.GAL

re-é-a-am za-ni-nu-⸢um⸣

ša a-na ṭè-mi ì-lí pu-tuq-⸢qú⸣

GÌR.NÍTA ša-aḫ-ṭa^* mur-te-ed-du-ú ú-si ⸢iš⸣-[x]

mu-ṭa-aḫ-ḫi-id sa-at-tu-uk-⸢ku⸣

mu-ki-in ni-id-bé-⸢e⸣

ša ud-da-kam iš-te-né-eʾ-ú

du-mu-uq ma-ḫa-za DINGIR.DINGIR

i-na é-sag-íl É.GAL ì-⸢lí⸣

i-gi-sa-a šu-úr-⸢ru⸣-ḫu

ú-še-er-re-bu qé-re-eb-šu

a-na eš-⸢re⸣-et DINGIR.DINGIR ka-⸢li⸣-ši-na

sa-ad-ru šu-ul-⸢ma⸣-num

DUMU ^mdAG-TIN-su-iq-bi NUN em-⸢qa⸣ a-na-ku

ì-nu-šu é-máš-da-ri É ^dINANNA a-kà-dè.KI

ša qé-er-bi KÁ.DINGIR.RA.KI

ša uš-šu-šu in-na-mu-ú

i-mu-ú ka-ar-mi-iš

li-ib-na-as-su id-ra-num

⸢iq⸣-mu-ú di-ta-al-li-iš

a-šar-šu šu-ud-du-ú

la ba-aš-mu sa-gu-šu

na-du-ú si-ma-ak-ki-šu

na-pa-ar-ku-ú qú-ut-re-num

e-pe-eš É ša-a-tim

li-ib-bi i-ta-mi-ma

ka-ba-at-ta ḫa-áš-ḫa-tu-šu

a-šar É šu-a-tim aš-te-ʾe-e-ma

a-ḫi-iṭ te-me-en-šu

i-ši-id-su ab-re-e-ma

ú-ki-in li-ib-na-as-su

é-máš-da-ri in qé-reb KÁ.DINGIR.RA.KI

e-eš-ši-iš e-pú-uš

a-na šu-a-ti ^dINANNA a-kà-dè.KI

i-la-at ta-am-ḫa-ri

É ša-a-tim

⸢ḫa⸣-di^*(text: MI)-iš nap-li-si-ma

⸢qí⸣-bi-i ba-la-ṭa₄

⸢ša⸣ úr-ru-ku u₄-mi-⸢ia⸣

šu-um-ú-da₄ ša-na-ti^*(text: MI)-⸢ia⸣

ma-ḫa-ar ^dAMAR.[x]

LUGAL DINGIR.[x]

at-mi-i ud-da-[x]

a-ša-ar qá-ab-[x]

ù ta-ḫa-zi-⸢im⸣

i-da-a-a al-⸢ki⸣

lu-na-ar a-a-bi-⸢ia⸣

⸢lu⸣-ša-am-qí-⸢it⸣

⸢na⸣-ki-ri-ia