a-na ^diš-tar šu-úr-bu-tum ru-um-ti ì-lí qá-ri-it-ti

^dIN.NIN i-la-at ta-am-ḫa-ri

e-pí-ša-at tu-qu-un-tim

na-mi-ir-ti be-le-et da-ad-mi ša-qu-tú i-gi₄-gi₄

ru-ba-a-tì ^da-nun-na-ki na-šá-at pu-lu-úḫ-tim

be-el-tim ša (erasure) mé-lam-mu-šá ša-mu-ú ka-at-mu

nam-ri-ru-šá er-ṣe-tim ra-pa-aš-tim sa-aḫ-pu

ka-ši-da-at a-a-bi mu-ḫal-li-qa-at za-ma-nu

^dINANNA a-kà-dè.KI be-let ta-ḫa-zi

ša-ki-na-at ṣu-la-a-ti a-ši-ba-at é-máš-da-ri

ša qé-re-eb KÁ.DINGIR.RA.KI (erasure) GAŠAN-ia

(erasure) ^dna-bi-um-na-ʾi-id LUGAL TIN.TIR.KI

⸢ti⸣-ri-iṣ qa-at ^dtu-tu à-áš-ri ka-an-šu pa-li-iḫ DINGIR GAL.GAL

re-é-a-am za-ni-nu ša a-na ṭè-e-mi ì-lí pu-tuq-qu

GÌR.NÍTA ša-aḫ-ṭú mu-ur-te-ed-du-ú ú-si ^diš-tar

mu-ṭaḫ-ḫi-id sa-at-tu-uk-ku mu-šar-ri-iḫ ni-id-bé-e

ša ud-da-kam iš-te-né-eʾ-ù du-mu-uq ma-ḫa-zi ì-lí

i-na é-sag-íl É.GAL ì-lí šu-tu-ru zi-in-na-a-ti

i-gi-sa-a šu-ur-ru-ḫu ú-še-re-bu qé-re-eb-šu

a-na eš-re-e-ti ì-lí ka-la-ši-na sa-ad-ru šu-ul-ma-nu

DUMU ^dna-bi-um-ba-la-at-su-iq-bi ru-ba-a e-em-qu-ma <a-na-ku>

i-nu-šu é-máš-da-ri É ^dINANNA a-kà-dè.KI ša qé-re-eb KÁ.DINGIR.RA.KI

ša uš-šu-šu in-<na>-mu-ú i-mu-ú kar-mi-iš

a-šar-šu šu^* (text: LA) ud-du-ú la ba-áš-mu sa-gu-šu

na-du-ú si-ma-ak-ki-šu na-par-ku-ú qú-ut-re-nu

e-pé-eš É ša-a-ti li-ib-bi i-ta-mi-ma

ka-ba-at-ti ḫa-áš-ḫa-tuš

a-šar É šu-a-tim aš-te-ʾe-e-ma a-ḫi-iṭ te-me-en-šu

i-ši-id-su ab-re-e-ma ú-ki-in li-ib-na-at-šu

é-máš-da-ri in qé-re-eb <KÁ.DINGIR.RA.KI> e-eš-ši-iš e-pú-uš

uš-šu-šu uš-te-ši-ir ú-ki-in te-em-me-en-šu

a-na šu-a-tim ^dINANNA a-kà-dè.KI

i-la-at ta-am-ḫa-ri

É šu-a-ti šu-ba-at na-ar-mi-ki

ḫa-di^*(text: MI)-iš na-ap-li-si-ma qí-bi-i ba-la-ṭa₄

ša ur-ri-ku u₄-mi-ia šu-um-ú-du ša-na-ti-ia

ma-ḫa-ar ^dAMAR.UTU LUGAL ì-lí tam-mi-i ud-da-kam

a-šar qab-lu ù ta-ḫa-zi i-da-a-a al-ki

lu-na-ar a-a-bi-ia

lu-ša-am-qí-it na-ki-ri-ia